LAOAG CITY – Ginutigot ti maysa nga opisyal ti Commission on Population and Development ti senado nga ipasa ti Adolescent Prevention Bill tapno malapdan ti panagngato ti bilang dagiti menor de edad nga agsikog.
Inbatad ni Mylin Mirasol Quiray, Commission on Population and Development acting division chief of the Knowledge Management and Communications Division a naduktalan da nga ado dagiti menor de edad nga umannugot a makinaig kas regalo iti anibersaryo da iti karelasyon da.
Kuna pay ni Quiray a basar iti datos da ket ado dagiti nagbalinen nga ama iti tawen da laeng a 10.
Inpalgak ni Quiray a maysa kadagiti factor iti panagngato ti bilang dagiti ubbing nga ama ket gapu iti nakaro nga exposure dagiti agtutubo iti pornographic materials.
Iti datos manipod iti Philippine Statistics Authority (PSA), Quiray, ti bilang dagiti agtutubo nga ama ket ngimmato manipod iti 5,000 idi 2018 to ket nagbalin a 8,000 idi 2019.
Gapu iti daytoy, kuna ni Quiray a kalikagom da a dagiti nagannak a mismo ket agbalin a nakasagana ken saan da nga agalumiim a pagsaritaan ti sex ken sexuality kadagiti annak da gapu ta daytoy nga impormasyon ket masapol nga aggapo iti uneg ti balay.
Innayon na a masapol a sursurwan dagiti nagannak dagiti annak da a protehiran ti kababalin, ingungutan ti bagi ken irupir ti kalintegan babaen ti panagkedked iti banag a saan a rumbeng nga aramiden.
