LAOAG CITY – Maalarma ti Commission on Population and Development (CPD) iti panagngato ti kaso ti teenage pregnancies iti intero a pagilian.
Daytoy ket kalpasan a rimuar iti datos ti Philippine Statistics Authority a ngimmato ti 6.6% ti bilang dagiti ubbing a babbai nga agtawen ti 10 agingga iti 14 ti agpaspasngay.
Idi 2019, adda ti 2,411 a babbai nga agtawen ti 10 agingga iti 14 a nagpasngay bayat nga idi 2023 ket ngimmato iti 3,343.
Rumrumuar a 38 a babbai nga agtawen met ti 15 agpababa ti nakapasar ti multiple pregnancies wenno namin-adon a daras a nagsikog idi 2023, idinto a 17 a balasitang nga agtawen ti 15 agingga iti 20 ket naminliman a daras a naganak wenno nasursurok pay.
Naamoan a dagiti lugar a kangrunaan a pakapaspasamakan ti nasao a problema ket kadagiti lugar nga addaan ti nangato a populasyon kas ti Metro Manila, Central Luzon, ken CALABARZON.
Segun ken ni Commission on Population and Development Undersecretary Lisa Grace Bersales, masapol a maaddaanen ti komprehensibo nga age-sensitive sexual education tapno dagus a masolbar ti kumarkaro a kaso ti teenage pregnancy.
Inpetteng ni Bersales a kasapulan pay a maaddaan ti dakkel a legisative action tapno masolbar ti nasao a problema, karaman ti pannakaipasa ti Senate Bill 1979 wenno Adolescent Pregnancy Prevention Bill tapno maprotehiran dagiti babbai manipod iti nasapa a panagsikog.
