LAOAG CITY – Nagballaag ti Commission on Population and Development (CPD) iti panagngato dagiti panagsikog kadagiti ubbing nga adolescent nga awan pay ti tawenda a 15 nupay bumabbaba ti pakabuklan a bilang ti teenage pregnancies ditoy Pilipinas.
Basar iti datos ti Philippine Statistics Authority (PSA), manipud iti 138,697 live births kadagiti babbai nga agtawen ti 10 agingga iti 19 idi 2024, 3,612 ket dagiti ubbing a babbai nga ub-ubing iti tawen a 15, ngimmato manipud iti 3,343 idi 2023.
Inbatad ni Commission on Population and Development Undersecretary Lisa Bersales a kabayatan nga agtultuloy a bumabbaba ti panagsikog iti tawen a 15 agingga iti 19 gapu iti maipatpatungpal a programa ti gobierno, ngumatngato met ti kaso kadagiti ub-ubing a grupo.
Karaman kadagiti rason ti kinarigat iti panagbiag, limitado nga oportunidad iti edukasion ken nasapa nga exposure iti seksual a linaon iti social media.
Dinakamat ni Bersales a kasapulan ti ad-adda a localized nga interventions pakairamanan iti panagtitinnulong kadagiti lokal a gobierno ken barangay ken panang-target kadagiti agtutubo iti wagas a maawatanda.
Ginutigotna a ti mensahe ket nasken a nakasentro saan laeng nga iti sex education no diket panangisuro kadagiti ubbing mainaig kadagiti arapaapda ken gagem iti biag.
Innayonna a napateg pay ti papel dagiti pagadalan ken mangisursuro iti pananglapped ti adolescent pregnancies ken nasken a maaddaan ti synchronized efforts kadagiti amin a Local Government Units tapno masigurado nga agkakatugma dagiti programa iti intero a pagilian.
