LAOAG CITY – Kalikagom ti Committee on education iti Sang Panlungsod iti pannakaiyemplo ti Guidance Counselor iti kada eskwela ditoy ciudad ti Laoag.
Inrakurak ti chairman ti komite a daytoy ti kayat na a kiddawen kabayatan ti City School board nga idaulwan ti local chief executive ken Department of Education (DepEd) Superintendent, ngem ti problema ket makatawenen nga awan ti kastoy a naiwayat a rumbeng koma a kada bolan.
Kuna ti chairman ti komite a napateg ti trabaho ti maysa a guidance counselor gapu ta isu ti kangrunaan nga asitgan dagiti agad-adal nga agkasapulan ti counselling ken pagibagaan da iti problema da.
Inbatad na pay a dakkel a banag ti panangbagbaga ti guidance counselor kadagiti estudyante nga addaan ti problema.
Mainaig iti daytoy, inpakaammo ti chairman ti komite a nagsurat iti Sang Panlungsod kadagiti maseknan nga opisyal maipanggep iti kalikagom na tapno mapagsasaritaan da a naimbag.
Innayon na a gagem daytoy a maamoan ti kasapulan para iti pagsayaatan ti pagadalan, dagiti estudyante ken mangisursuro.
