LAOAG CITY – Kalikagom ni Sen. Grace Poe a maiyuswat ti naun-uneg nga imbestigasyon ti pannakaarinebneb ti bangka iti Binangonan Rizal tapno mapagsungbat ti responsable iti daytoy.
Rakurak daytoy ti senador kageddan ti panangipakammo na a ti idadaulwan na a Committee on Public Services ket mangiyuswat met ti kabukbukudan na nga imbestigasyon.
Segun kenni Poe, ado a biag ti napukaw gapo iti liway wenno gapo iti posible a kurapsyon isut gapo na a determinado da mangduktal iti napasamak.
Kunana a maysa kadagiti pagpokusan ti imbestigasyon da ket no apay nga inpalubos ti Philippine Coast Guard ti motorboat nga agbyahe iti laksid ti napigsa nga angin ken tudo.
Inbatad na a ti Philippine Coast Guard ken ti agtagikua iti bangka ket masapol nga agpalawag mainaig iti kaado dagiti naglugan a limmabes pay iti kapasididad daytoy.
Dinakamat na pay ti kaawan ti life vests dagiti pasaheros a rumbeng a suot da iti panagbyahe da.
