LAOAG CITY – Inbabawi ti Inter-Agency Task Force for the Management of the Emerging Infectious Diseases (IATF) ti desisyon a maikkat wenno mai-lift ti community quarantine kadagiti lugar a maibilang a low risk areas a gubuay ti covid-19.
Kayat na a sawen daytoy ket agtalinaed a Modified General Community Quarantine ti agtultuloy a maipatungpal kadagiti lugar a nairakurak a maikkat ti quarantine na.
Kuna ni Presidential Spokesman Harry Roque, ti intero a pagilyan ket maisalinong manen iti quarantine, no sadinno a kas iti Metro Manila, Laguna ken Cebu ket adda iti modified ECQ idinto a dagiti dadduma a lugar ket adda iti GCQ ken modified GCQ met kadagiti ummunan a naideklara a “green zone.”
Iti panagbitla ni Interior Secretary Eduardo Año iti Palace press conference, daytoy a desisyon ket gapo iti apela wenno kiddaw dagiti gobernador ken mayor a saan da pay a nakasagana nga ikkaten ti community quarantine.
Segun kenni Año, ti baro a polisiya ket pakairamanan dagiti 37 a probinsya, 11 a ciudad ken maipatungpal kadagitoy ti modified general community quarantine kalpasan ti May 15.
Karaman kadagiti low-risk provinces ken cities ket iti Region I, Region IV-B, Region V, Region VI, Region VIII, Region X Region XII ken ti Bangsamoro Autonomous Region in Muslim Mindanao.
Innayon na nga awan ti lugar ditoy intero a Pilipinas a saan a maisalinong iti community quarantine no diket agsasabli laeng ti lebel na.
