LAOAG CITY – Kinumpirmaran ni Barangay Chairman Joselito Bercalona iti Barangay Bil-loca iti ciudad ti Batac a naka-lockdown ti compound nga ayan ti pagtaengan ni IN-C464.
Segun iti kapitan, ti contact ni IN-C464 ket ti katrabahoan na met laeng ditoy ciudad ti Laoag a ni IN-C462 a residente iti Barangay 11 ditoy ciudad.
Inlawlawag na a naamoan na laeng a na-exposed ti kabarangayan na idi kalman kageddan iti panaakiparuk-at ti resulta ti swab test na.
Masdaaw pay ti kapitan gapo ta saan a naipakammo kenkuana nga adda ti kabarangayan na nga adda ti exposed iti nagpositibo iti covid-19 rason a saan a nabantayan.
Basar iti impormasyon na, napan pay laeng nagtrabaho ti ina na ken ti anak na idi kalman sakbay a naawat da ti resulta ti swab test da.
Gapo iti daytoy, karaman iti contact tracing ket ti pamilya ken karruba ni IN-C464, pakairamanan pay ti pagtrabahoan ti ina na a maysa a bakery iti sentro ti ciudad ti Batac ken ti bakery a pagub-ubraan ti kabsat na iti kabangibang a barangay.
Mainaig iti daytoy, kuna ni Police Lt. Col. Roger Digmayo, chief of police ti PNP-Batac nga awan pay dagiti pasdek negosyo a nailockdown kalpasan ti rakurak ti kapitan.
