LAOAG CITY – Nabirukan ti bangkay ti maysa a lalaki iti igid ti baybay nga asideg ti masansan a pakapaspasamakan ti landslide iti Sitio Banquero, Brgy Pancian iti ili ti Pagudpud.
Binigbig ni Police Lt. Bjay Calivoso, ti Deputy Chief of Police iti ili ti Pagudpud ti biktima a ni Kyle Christian Izon y Eugenio, agtawen ti 22, computer engineering student iti Mariano Marcos State University (MMSU) ken residente iti Brgy. Colo iti ciudad ti Batac.
Inbatad ni Calivoso a basar iti inisyal nga imbestigasyon da, nagsinnungbat ti biktima ken ti nobya na rason a rimuar ni Izon no sadinno nga inpagarop ti kaayan-ayat na a napan laeng iti pagtagilakoan tapno gumatang iti meryenda wenno napan agpallailang nga isu ti ar-aramiden na iti kallabes.
Nupay kasta, kuna ni Calivoso a nagbalaw laengen ti nobya na idi makita na ti post iti facebook mainaig iti nabirukan a bangkay ti lalaki no sadinno a binigbig na a mismo a daytoy ti nobyo na.
Inpakaammo ni Calivoso nga iti pannakaeksamen ti bangkay ti biktima ket awan ti nakita da a foul play gapu ta awan ti pinasaran na a sugat iti bagina babaen koma iti paltog wenno natadem a banag.
Innayon na nga uray ti pamilya ti biktima ket mamati nga awan ti foul play iti napasamak gapu ta awan ti karirriri ti nasao nga estudyante.
Nupay kasta, kuna ni Calivoso a kiniddaw latta ti pamilya ti biktima a maipadalan iti otopsya ti bangkay ti biktima tapno masigurado nga awan ti foul play iti pannakatay na.
Kuna pay ti deputy chief of police nga adda ti nakita a sugat iti ulo ti biktima ngem mabalin a gapu iti pannakaitupar na iti bato kalpasan a naregreg iti agarop 40 a metro ti kauneg na a derraas a nangitunda ti pannakatay na.
Inpakaammo na a dakdakkel ti posibilidad na a nagpakamatay ti biktima gapu ta basar pay iti imbestigasyon da ket agprob-problema ti estudyante kadagiti naglabas a lawas iti pinansyal, problema iti pamilya ken ti panagadal na.
Immun-una iti daytoy, inbatad ni Calivoso a manipod iti ciudad ti Batac ket nagturong ti biktima iti ili ti Pagudpud babaen ti panaglugan na ti motorsiklo.
