LAOAG CITY – Maysa a naidumduma a teknolohia ti inrubuat ti maysa a biotech company idiay Australia: maysa a biological computer nga addaan ti aktual nga human brain cells nga inusar kas paset ti sistemana.
Ti kompania Cortical Labs ti adda iti likudan a maaw-awaganda a CL1, ti umuna a code-deployable biological computer iti intero a lubong.
Imbes a puro silicon chips ti usaren, innayonda dagiti neuron cells manipud iti stem cells tapno makapartuat ti maysa a sistema nga adda ti kabaelanna a makasursuro nga al-alisto maidasig iti tradisional nga artificial intelligence (AI).
Saan daytoy ti umuna a daras a ginandat ti Cortical Labs ti nasao a teknolohia. Idi 2022, nakitinnulongda iti Monash University tapno makapartuat ti maysa a laboratory-based neural computer a nakasursuro nga agay-ayam ti video game a Pong iti uneg laeng ti lima a minuto.
Nupay kasta. napanunutanda a limitado laeng daytoy iti uneg ti laboratorio isu a nangaramidda ti maysa nga ad-adda a portable ken praktikal a bersion, ti CL1.
