LAOAG CITY – Mangnamnama ni Ilocos Norte 2nd District Representative Angelo Marcos Barba nga adda ti maikapat a bansada dagiti benepisiario ti Tulong Panghanapbuhay sa Ating Disadvantaged/Displaced Workers wenno TUPAD iti ili ti San Nicolas.
Segun kenkuana, masapol laeng a maipayalisto ti pannakaipasa ti listaan dagiti maseknan a benepisiario tapno dagusda a makailatang ti pundo para iti daytoy a programa.
Inbatadna nga iti kallabes ket naawat metten ti sueldo dagiti nakipaset iti nasao a programa babaen iti Department of Labor and Employment wenno DOLE dagiti 120 a benepisiario iti ili ti San Nicolas, 119 iti ili ti Dingras, 200 iti ili ti Marcos ken 208 iti ili ti Banna.
Kabayatanna, idi laeng kalman naiyawat metten ti sueldo dagiti nakipartisipar iti programa iti siudad ti Batac a dumanon iti 149 a benepisiario, 150 iti ili ti Paoay, 180 iti ili ti Currimao ken 118 iti ili ti Badoc.
