LAOAG CITY – Inlawlawag ni Ilocos Norte 1st District Representative Sandro Marcos a saan a band aid solution ti food stamp program ti Department of Social Welfare and Development.
Segun kenkuana, dagiti maseknan a benepisiario a maipaayan iti nasao a tulong ti ahensia ti gobierno ket dagiti maibilang a nakukurapay wenno dagiti awan ti pangalaanda ti paggatangda kadagiti ipaunegda a taraon.
Inbatadna a dagiti sumagmamano kadagitoy ket nakadepende laeng no ania ti iyawat a tulong ti gobierno kadakuada.
Nupay kasta, inlawlawagna a saan a mabalin a kastoy lattan nga agtultuloy ti mapaspasaranda isu nga agbirbiruk ti maseknan nga ahensia ti gobierno ti wagas tapno matulungan dagitoy iti kabiitan a panawen ken maiyadayoda iti panagbisin.
