LAOAG CITY – Inpasigurado ni Ilocos Norte 1st District Rep. Sandro Marcos nga aramiden da amin a kabaelan da tapno matarimaan ti flood control iti Barangay Alsem iti ili ti Vintar.
Segun kenni Marcos, saanna a proyekto daytoy ngem kas agdama a diputado ket responsibilidad na nga urnusen dagitoy.
Inlawlawag na a ti proyekto ket napondoan idi 2018 ken naiyimplementar idi 2019-2022 sakbay a nagtugaw iti posisyon na.
Kunana a ti umuna a proyekto na kas diputado ket dagiti solar lights nga uray kasano ti kapigsa ti bagyo ket awan pay pulos ti naperdi uray maysa kadagitoy.
Kabayatanna, inbatad na a ditoy umuna a distrito uray saan nga inbilin ti Department of Public Works and Highways, ti ar-aramiden da ket aggapo iti barangay dagiti rekomendasyon no ania dagiti proyekto a kasapulan da ken maidanun daytoy iti local chief executive.
