LAOAG CITY – Mamati ni Ilocos Norte 1st District Representative Sandro Marcos a no adda ti online gambling iti Pilipinas ket masapol a nangato met ti mapastrek ti gobierno ditoy pagilian.
Kuna na a rumbeng nga agbayad ti buwis dagiti gambling operators ken ti mapastrek ti gobierno ket usaren para iti dadduma a pakabenepisyaran ti umili.
Mainaig iti daytoy, inpakaammo ni Congressman Marcos nga adda ti inpila na a maysa a gakat para iti pannakaipaay ti subsidiya iti gastos iti kuriente iti intero a pagilian.
Inpetteng na pay a ti laeng Pilipinas ti kakaisuna a nasyon iti ASIAN region a saan a tumultulong kadagiti umili para iti panagbayad ti kuryente.
Immunan nga inbatad ti diputado a iti online gambling ti maysa kadagiti kadakkelan nga isyu a mapagsasaritaan iti kongreso iti agdama.
Daytoy ket kalpasan nga adda ti dua a diputado a naduktalan nga agbuybuya ti e-sabong kabayatan ti session ti kamara de representantes idi Lunes, Hulyo 28.
Innayon na a daytoy ti tutukan ti Committee on Ethics nga idaulwan ni Congressman JC Abalos.
Kabayatanna, personal nga inawat ni Congressman Marcos ti certificate of commendation manipod iti konseho ditoy ciudad ti Laoag babaen ti maysa a resolusyon nga inpasa ti 13th Sang Panlungsod no sadinno a ti author ket ni Konsehal Rbee Ablan para iti baro a role ti diputado kas House Majority Leader iti 20th Congress.
