LAOAG CITY – Nakigtot ni Ilocos Norte 1st District Representative Sandro Marcos iti ibibisita na iti Laoag City General Hospital ditoy ciudad ti Laoag.
Daytoy ket gapu ta malaksid a mabilbilang laeng ti makita a tao iti nadakamat nga ospital ket nasipnget pay.
Inyarig ni Marcos ti nakitkita na a sitwasyon ti nadakamat nga ospital iti ubing pay a nakaad-ado ti tao nga agturturong iti lugar isut gapuna a maladingitan iti naimatangan na.
Mainaig iti daytoy, inadmitir ti kongresista a dakkel ti problema iti Laoag City General Hospital iti agdama isut gapuna a nangipaay ti opisina na ti CT scan tapno adda ti nayun a pamastrekan ti nasao nga ospital.
Inbatad na a saanna nga ammo no ania ti ar-aramiden nga addang ti gobierno lokal ditoy ciudad mainaig iti sangsangwen a problema ti nasao nga ospital.
