LAOAG CITY – Suportaran ni Representative Brian Raymund Yamsuan ti plano ti Philippine National Police (PNP) iti panaggatang kadagiti body-worn-cameras nga addaan ti artificial intelligence (AI) capabilities.
Inbatad ni Yamsuan a kasapulan nga ag-invest pay ti Philippine National police iti panangipadalan iti training dagiti personnel para iti umiso nga handling, filing ken storage kadagiti video footages iti nasao a devices tapno masigurado a saan a ma-tamper kangrunaan na ket usaren daytoy kas ebidensiya iti korte kontra kadagiti suspek.
Ginutigot pay ni Yamsuan ti Philippine National Police a palawaen ti panagusar ti digitalized crime reporting system na ken dadduma pay a technological innovations tapno gutiguten ti partisipasyon ti umili iti panangparmek ken pananglaban iti krimen.
Segun ken ni Yamsuan a maysa metlaeng a dati nga opisyal ti Department of the Interior and Local Government (DILG), ti panagusar kadagiti diskarte iti teknolohiya ket makatulong a mangpasayaat ti performance ti Philippine National Police a mangbukel ti panagtalek ken kumpiyansa ti publiko iti organisasyon ti nailian a pulisya.
Dinayaw met ni Yamsuan ti Philippine National Police iti panangidaulo ni General Rommel Marbil iti inisyal a panangipatungpal na iti Metro Manila ti Law Enforcement Reporting and Information System (LERIS), maysa a digitalized policing app a mangipaay ti gundaway iti publiko a mangireport kadagiti mapagduduwaan nga insidente ken krimen usar dagiti mobile phone.
Inrakurak ni Yamsuan a masapol a mangipatungpal ti information drive iti social media tapno agbalin a pamilyar ti publiko iti panagusar ti Law Enforcement Reporting and Information System babaen ti eGovPH.
Adda ti P1.2 billion a pondo nga inlatang ti Philippine National Police para iti programa a Law Enforcement Reporting and Information System.
