LAOAG CITY – Inbatad ni Congressman Sandro Marcos nga awan ti plano na a personal a mapan mangikampanya kadagiti suportaran na a kandidato a para Barangay ken Sang Kabataang Elections.
Inlawlawag na a nasaysayaat no awan dagiti kandidato a mapan na personal nga ikampanya no saanna a masapasap tapno awan dagiti aggiinnilem.
Kuna na a ti laeng aramiden na ket mang-supervised kadagiti suportaran na a kandidato para iti mapaspasangasangan nga eleksyon.
Mainaig iti daytoy, mamati ti kongresista a no dagiti suportaran na a kandidato para iti Barangay ken Sang Kabataang Elections ti botosan ti umili ket masigurado nga ad-adda a kabaelan da ti mangipaay kadagiti nagduduma a serbisyo.
Innayon na a no kadwa ti kapitan ket al-alisto a dumanun iti ground dagiti serbisyo ken tulong a para kadagiti residente.
Kabayatanna, inpetteng ni Marcos nga awan ti kinapudno na ti alegasyon a mapulpulitika dagiti programa ti gobierno.
Inpaganetget na a dagiti maipaayan ti tulong babaen iti Department of Labor and Employment ken Department of Social Welfare and Development ket dagiti marigrigat karaman dagiti benepisyaryo ti Pantawid Pamilyang Pilipino Program (4Ps).
Kinontra pay ti kongresista ti alegasyon a dagiti kadwa na iti pulitika wenno kandidato ti agpilpili kadagiti maipaayan ti tulong manipod iti gobierno.
Inpalgak ni Marcos nga awan ti kinapudno na daytoy gapu ta kas pammaneknek ket adda dagiti saanna a kadwa nga opisyal ti barangay a mapmapan agkidkiddaw ti tulong iti opisina na no sadinno a sidadaan met latta a tumulong kadagitoy.
