LAOAG CITY – Nasdaaw ni Ilocos Norte First District Congresswoman Ria Fariñas no apay adda dagiti negatibo a komento seknan iti panagturong na kadua na ni dati a Mayor Chevylle Fariñas kabayatan ti pannakauram ti ME shopping center iti Brgy. 16 ditoy siudad ti Laoag.
Inbatad na a kayat na laeng nga imatangan ti sitwasyon ken tumulong kadagiti kameng ti Bureau of Fire Protection babaen ti kukua da a tanker ti danum tapno mangipaay ti nayun a suplay ti danum dagiti fire truck a pangsebseb ti apoy.
Segun kenni Diputado Fariñas, awan ti anyaman kenkuana dagiti maibagbaga a dandanin ti eleksiyon rason nga adda da iti nasao lugar, ngem ketdi naipasiguden iti pamilya da tumultulong no kasta nga adda ti didigra.
Kuna na a nawaya kadagiti tattao ti mangted ti opinion iti kaadda da iti nakapasamakan ti uram ngem gagem da laeng ti tumutlong.
Inpetteng ti kongresista a timmulong da laeng kadagiti otoridad para iti pannakasebseb ti shopping center nangruna ket sakupen ti nasao a barangay nga idadauloan ti kabsat na a ni Barangay Chairman Carlos Fariñas.
Sinaludaran na dagiti kameng ti Bureau of Fire Protection a nagresponde manipud kadagiti nagduduma nga ili gapu ti kinatured da tapno laeng masebseban ti apoy iti nasao a pasdek negosyo.
