LAOAG CITY – Ballaigi a naarestar ti maysa a lalaki, agtawen ti 40, naasawaan, construction company driver ken residente iti ili ti Currimao.
Daytoy ket kalpasan a naduktalan a nagtakaw dagiti landok a maus-usar para iti manarimaan a matartarimaan a drainage canal iti nagbedngan iti ili ti Paoay ken Currimao.
Segun ken ni Police Captain Sigman Benigno, Hepe ti Philippine National Police iti nasao nga ili, naarestar ti suspek babaen iti nagtipon a puersa ti Philippine National Police – Currimao ken Philippine National Police iti ili ti Paoay.
Inbatadna a basar iti insayangkatda nga imbestigasion, kabayatan ti panagturong ti maysa a kameng ti Philippine National Police iti Currimao nga agturong iti ili ti Paoay ket ditana a naripar nga agikarkarga ti suspek kadagiti landok iti kurong-kurong.
Gapu iti daytoy, inlawlawagna a nagsardeng ti Police Officer ken nagsaludsod iti suspek no pangikabilanna dagiti landok ngem dagus daytoy a naglibas.
Nupay kasta, kunana a dagus a nakikoordinar ti pulis kadagiti kaatsigan a kuerpo ti pulisia ket ditoy a ballaigida a natiliw ti nasao a suspek.
Innayonna a nakasoan ti suspek iti simple theft ken nagtalinaed iti kustodiar ti pulisia para iti naan-anay nga imbestigasion.
