LAOAG CITY – Inlawlawag ni Senate Committee on Accounts Chairman Alan Peter Cayetano nga agtultuloy ti pannakaipasdek ti New Senate Building (NSB) iti siudad ti Taguig.
Mainaig iti daytoy, immun-una a sinuspende ni Senate President Chiz Escudero ti pannakaipasdek ti baro a pasdek ti Senado gapu iti kellaat a panagngato ti pondo a dumanon iti P23 billion manipud iti dati a P8.9 bilion.
Segun kenni Cayetano, agtultuloy ti pannakaibangon ti phase 1 ken phase 2 ti New Senate Building bayat a mare-review ti baro a liderato ti panagngato ti pondo para iti pannakaipasdek ti New Senate Buildong.
Inbatad ti senador a ti laeng na-hold ket ti nayon a P10 billion a pondo a kasapulan tapno makompleto ti imprastruktura.
Iti agdama, manipud P8.9 billion, ngimmato ti gatad a nagastos para iti pannakaipasdek ti New Senate Building iti P13 billion ken adda pay nayon a P10 billion tapnu maileppas daytoy ken ti nainayon a gatad ket saan pay a naglasat iti bid wenno procurement, rason a napasardengen tapno maadal a naimbag.
Kabayatanna, kinuna pay ni Cayetano nga adda dagiti innala da nga eksperto a tumulong a mangrepaso iti Senate Secretariat, staff ti Committee on Accounts, ken dagiti mismo nga staff ti senador.
