LAOAG CITY – Nagpatulong iti Bombo Radyo Laoag ti maysa a construction worker a ni Mr. Ernesto Acosta, tapno makaawiden ditoy ciudad ti Laoag.
Ni Acosta ket agdama nga adda idiay Pasay City ken kayat na ti agawid iti pagkaskaseraan na iti Barangay 51-A, Nangalisan ditoy ciudad ti Laoag gapu ta nagsardeng pay laeng ti trabaho.
Inlawlawag na a sipud nangrugi ti lockdown gapu iti covid-19 ket naipasardeng pay laeng ti trabaho da.
Inbaga na nga adda ti it-ited ti barangay nga ayan da ken ti akinbagi ti pagpapaayan na a construction firm ngem bassit laeng gapu ta ado da met nga agbibingay.
Innayon na a saan da pulos a makaruwar iti building a patpatakderen da gapu iti mapaspasaran a covid-19 pandemic.
Kabayatanna, binalakadan ni Mr. Bong Adora iti Admin Office iti Laoag City Hall a mapan laeng ni Acosta iti kaasitgan a PNP Station tapno mangala ti travel pass gapu ta maibilang daytoy kas locally stranded individual.
Nupay kasta, kuna ni Adora a no awan ti bukod a lugan ni Acosta ket mabalin da nga iyendorsar iti programa ti kapitolyo probinsyal a “Balik-Probinsya” tapno makaawiden ditoy ciudad ti Laoag.
