LAOAG CITY – Dead on arrival ti maysa a construction worker kalpasan a binagko-bagkong ti padana met a laeng construction worker iti Brgy. 5, San Pedro ditoy siudad ti Laoag.
Basar iti Laoag City Police Station, nabigbig ti biktima a ni Isagani Rapanan Tabbay, agtawen iti 50, naasawaan ken residente ti Padday West, Buguey, Cagayan idinto a nabigbig met ti suspek a ni Marcelino Carillo Calabiao, agtawen iti 39, naasawaan ken residente ti Brgy. Minanga West, Buguey, Cagayan nga agpada dagitoy nga stay in construction worker iti maysa a construction site.
Maibasar iti imbestigasion, kabayatan nga agiinum ti biktima ken dagiti kakaduana a construction workers iti barracks-da ket simmangpet ti suspek a nabartek ken nakikadua daytoy a makiinum.
Naammoan a kabayatan nga agiinum dagitoy ket napan kinomprontar ti suspek ti kabagian ti biktima a ni Alexander Tabbay Fariñas iti saan pay a masinunuo a rason.
Nupay kasta, nagtalaw ti suspek a napan iti kuartona tapno mapan mangala ti kutsilyo ken inpakitana daytoy iti biktima ken kadagiti kabagianna.
Mainaig iti daytoy, kinamat ti suspek ti biktima ken dagiti kabagianna no sadinno dagus dagitoy a nagturong iti guard house tapno agkiddaw ti tulong iti duty security guard.
Basar iti naiwayat nga imbestigasion, nakamatan ti suspek ti biktima isu a binagkongna daytoy iti namin-adu a daras iti nagduduma a paset iti bagina kangrunaanna iti paset ti akinkannigid nga abagana, akinkannigid a kili-kilina ken nasugatan pay ti akinkannawan nga imana.
Nakataray pay laeng ti biktima a napan iti barracks iti foreman-da ngem nakamatan manen ti suspek isuna rason a binagkongna manen daytoy.
Dagus a naglibas ti suspek kalpasan iti inaramidna a krimen ngem babaen iti duty personnel ti Protect Box iti sango ti Ferdinand Edralin Marcos Stadium ket insigida met laeng a natiliw ti suspek a naglemmeng iti barracks-da.
Kabayatanna, iti agdama ket adda iti kustodiar ti Philippine National Police ditoy siudad ti Laoag ti suspek ken maisagsagana ti kaso a maipila kontra kenkuana.
