LAOAG CITY – Binagkong ti maysa a negosiante ti maysa a Construction Worker iti ili a Currimao.
Nabigbig ti biktima a ni Felix Eisma, agtawen ti 37, naasawaan ken maysa a Construction Worker idinto a ti suspek ket ni Allan Tabada, agtawen ti 32, naasawaan ken maysa a negosyante, agpada a residente iti Brgy. Poblacion 2 iti nadakamat nga ili.
Segun ken ni Police Captain Michael Permison, Officer In Charge ti PNP Currimao, bayat nga agin-inum ti suspek kaduana da Heronimo Arce, agtawen ti 62, mannalon, Nicolas Fernandez Jr., agtawen ti 39 ken Brando Bidez, residente met laeng iti nadakamat a barangay iti sangoanan ti pagtaengan ni Eisma idi inawis pay ni Tabada ti biktima nga uminom.
Inbatad na a kalpasan iti daytoy ket nagkinnarit ni Tabada ken Eisma gapu iti saan a panagkikinnaawatan rason a nagkabil dagitoy a dagus met nga inanawa dagiti pada da nga agi-inum.
Sumagmamano a minutos ti napalabas ket nagkinnarit manen dagitoy agingga nakapungtot ti suspek ket ditoy a binagkong ti buksit ti biktima ken dagus a naglibas ken iggem ti kutsilyo nga inusar na iti pammagkong.
Gapu iti daytoy, dagus a naitaray ti biktima ti Rural Health Unit iti ili a Currimao ngem inyakar da iti Mariano Marcos Memorial Hospital and Medical Center iti ciudad ti Batac.
Naamoan nga adda ti datin a riri ti suspek ken biktima.
Kabayatanna, manarimaan pay laeng a matamtaming ti biktima iti nasao a balay pagagasan ken manarimaan met ti panagbirok ti PNP Currimao iti nasao a suspek.
