LAOAG CITY – Nagballaigi dagiti otoridad a nangtiliw iti maibilang a most wanted person iti ili ti Badoc.
Ti operasyon ket naiyuswat babaen ti nagtipon a pwersa ti Philippine National Police iti ili ti Badoc ken ti 2nd Provincial Mobile Force Company iti Ilocos Norte Police Provincial Office.
Nabigbig ti akusado nga agtawen ti 34, awanan ti asawa, construction worker ken residente iti Sitio Malasig, Barangay Madupayas iti ili ti Badoc.
Natiliw ti akusado babaen ti bileg ti warrant of arrest nga inparuk-at ti Presiding Judge iti 1st Judicial Region Branch 6 iti ciudad ti Batac gapu iti kaso na nga statutory rape.
Segun ken ni Police Major Joseph Tayaban, ti chief of police iti ili ti Badoc, awan ti nairekomendar a pagpiyansa ti akusado para iti temporaryo a pannakawaya-waya na.
Gapu iti daytoy, nagtalinaed ti akusado iti kustodyar ti Philippine National Police iti ili ti Badoc ken manamnama a maiturnover ita nga aldaw iti naggapwan ti warrant of arrest.
