LAOAG CITY – Pimmusay ti maysa a lalaki kalpasan ti napasamak a desgrasya iti national highway a paset ti Brgy. 24 iti ili ti San Nicolas.
Daytoy ti kinumpirmaran ni PMaj. Joseph Tayaban, hepe ti PNP iti nasao nga ili.
Binigbig ni Tayaban ti pimmusay a ni Reniel Rumbao, agtawen ti 25, naasawaan, construction worker ken residente iti nasao a barangay.
Kuna ni Tayaban a basar iti panagimbestigar da, agawid ti biktima a nagiturong ti kurong-kurong manipod iti sentro ti San Nicolas
Nu pay kasta, inbatad na a bayat nga agpadpadaya daytoy ket nadungpar na ti bunto ti semento a nagbakbakan ti natarimaan a kalsada.
Gapu iti daytoy, inpakaammo ti hepe a naipurwak ti Rumbao ken napan iti bangir a linya ti kurong-kurong.
Kuna na a dita a naidungpar met ti agpapalaud a motorsiklo nga inturong ni Bhee Jay Apostol, agtawen ti 26 kasta met ti simmaruno iti daytoy a kurong-kurong nga inturong ni Christian Agamata, agtawen ti 24 ken maysa delivery courier ken agpada dagitoy a residente iti ili ti Dingras.
Segun ken ni Tayaban, nagsagaba ti nagduduma a sukat iti bagi ken nakana a sugat iti ulo ni Rumbao ken isu ti puon ti dagus a pannakatay daytoy idinto a gasgas iti nagduduma a paset ti bagi ti sinagaba da Apostol ken ni Agamata.
Inpakaammo ni Tayaban a kabayatan ti panagimbestigarda ket nakita nga awan ti nakaestablisar nga aniaman nga early warning device iti nabunton a semento.
Gapu iti daytoy, inbatad na nga agtultuloy ti imbestigasyon iti nasao a desgrasya ken masapol a mapagsungbat ti aki iggem ti konstruksyon ti kalsada.
