LAOAG CITY – Kinumpirmaran ni Police Major Arnel Tabaog, ti chief of police ti PNP-Vintar a pimmusay ti maysa a lalaki kalpasan a nakuryente iti Barangay 20, Cabisuculan iti nasao nga ili.
Binigbig ni Tabaog ti biktima a ni Arnel Pacubat, agtawen ti 35, addaan ti live in partner, maysa a construction worker ken residente iti nasao a lugar.
Segun kenni Tabaog, mapan kuma agala ti biktima ti kanen dagiti taraken na a baka ken iti panagdallaysat na iti waig a mapan iti taltalon ket maipagarop a naiggaman na ti waya a kimmamang ti electric pump a rason ti pannakakuryente na.
Kunana a basar iti palawag ti live in partner ti biktima a ni Maricel, gapo ta saan na a mapasangpet ti lalaki ket nagpatulong kadagiti karruba da tapno biruken daytoy ken ditoy a nakita da a nakadasay ni Pacupat.
Basar iti panageksamin ti doktor, adda ti sugat iti dakulap ken iti ulo ti biktima a rason ti pannakatay na.
Inlawlawag a posible a gapo iti nabayagen a tudtudo a mapaspasaran ti lugar ket mabalin a nairis-risiris ti waya iti kayokayo ken nauklapan daytoy.
Naamoan a ti electric pump a nakaikamangan ti waya ket kukua ti karruba ti biktima.
Agtultuloy met ti imbestigasyon dagiti otoridad seknan iti daytoy a banag ken awan ti foul play a napasamak.
