LAOAG CITY – Nasugat ti rupa ti maysa a construction worker babaen iti kinainomanna iti Brgy. Puttao iti ili ti Solsona.
Segun ken ni P/Capt. Randy Damo, Hepe ti Solsona Municipal Police Station, nabigbig ti biktima nga agtawen iti 33 ken naasawaan idinto a nabigbig met ti suspek nga agtawen iti 38, naasawaan, mannalon ken agpada dagitoy a residente iti nasao a barangay.
Inbatadna a basar iti inwayatda nga imbestigasion, kabayatan nga agiinom ti suspek ken dagiti kakaduana iti maysa a pagtaengan ket simmangpet ti biktima a maipagarup a nabartek a nakidanggay iti panagiinomda.
Inlawlawagna a kabayatan ti panagiinom dagitoy ket adda ti saan a panagkikinnaawatan iti nagbaetan ti biktima ken iti suspek iti saan pay a masinunuo a rason.
Gapu iti daytoy, nakabusor ti suspek ket napan nangala ti kayo nga isu ti inusarna a pinangmalo iti rupa ti biktima.
Kunana a nagsagaba ti iwa iti paset ti kiday ken ngiwat ti biktima a naitaray iti Solsona Rural Health Unit para iti pannakatamingna ngem naiyakar iti Mariano Marcos Memorial Hospital and Medical Center iti siudad ti Batac.
Innayonna a rumrummuar iti imbestigasionda nga adda ti dati a susik dagiti dua nga am-ammoen pay laeng dagiti otoridad.
