LAOAG CITY – Naarestar ti maysa a construction worker kalpasan a naalaan ti granada iti Barangay Capurictan iti ili ti Solsona.
Segun ken ni P/Capt. Randy Damo, Hepe ti Solsona Municipal Police Station, basar iti inwayatda nga imbestigasion, kabayatan nga agiinum ti biktima ken dagiti kakaduana ket adda ti saanda a nagkikinnaawatan iti saan pay a masinunuo a rason.
Gapu iti daytoy, kunana nga adda ti maipagarup a napasamak a panagriri dagiti maseknan.
Inbatadna a nagawid ti suspek ngem apaman a nagsubli daytoy ket adda met ti iggemnan a granada.
Inlawlawagna nga insigida nga inagaw daytoy ti maysa kadagiti kinainnumanna a kaanakanna rason a naala ti granada kenkuana.
Mainaig iti daytoy, naiget a naglikudan ti suspek a kukuana ti nasao a granada ngem inpetteng dagiti nakakita a kukuana daytoy.
Naammoan a ti nasao a klase ti granada ket maysa a flush bang hand grenade.
Innayonna a sumango ti suspek iti kaso gapu iti panaglabsingna iti Republic Act No. 9516 wenno ti Illegal Possession of Firearms and Explosive Devices.
