LAOAG CITY – Agtultuloy a maag-agasan ti maysa a construction worker iti Governor Roque Ablan Senior Memorial Hospital ditoy ciudad ti Laoag kalpasan a binagkong ti pada na metlaeng a construction worker iti Barangay Talogtog iti ili ti Solsona.
Nabigbig ti biktima a ni Darren Magaoay, addaan ti live-in partner ken taga Barangay 28, Cabusligan iti ili ti Bacarra idinto a ti maitudtudo a suspek ket ni Rudy Garalde.
Inbatad ni Lovely Nicole Domingo, live-in partner ti biktima a madama ti panag-video call da idi napasamak ti insidente no sadinno a nakita na lattan ti dara a nagtedted isut gapu na a naalarma ken arigna saanna nga ammon ti aramiden na.
Inlawlawag na a ti nangngeg na sakbay ti pammagkong ket sinaludsud ti live-in na no ania ti inaramid ti suspek iti electric fan gapu ta natukkol, banag a nagpungtutan ni Garalde ken nangitunda ti panangbagkong na ti namintallo a daras iti biktima.
Inpakaammo ni Domingo a ti maysa a bagkong ti live-in na ket damgis laeng idinto a ti dua a tama na ket nakaro gapu ta nabuttawan ti bagisna.
Innayon na a nakaro ti kinabartek ti suspek idi napasamak ti insidente ken nagtalapwagaw a dagus kalpasan ti panangbagkong na iti biktima.
Mainaig iti daytoy, kuna ni Domingo nga inlungalong dagiti kasinsin ni Garalde a pagsasaritaan da laengen ti napasamak ngem pursigido da a mangireklamo ti suspek kangrunaan na ket awan pay pulos ti kapamilya na a personal a napan nakisarita kadakuada seknan iti napasamak.
Naamoan nga immuna nga inyendorsar iti barangay ti Philippine National Police iti ili ti Solsona ti napasamak gapu ta ti inpagarop da ket damgis laeng ti sinagaba a sugat ti biktima.
Kabayatanna, inbatad ni Police Capt. Randy Damo, ti chief of police iti ili ti Solsona a ti ammo da ket saan a nakaro ti sinagaba a sugat ti biktima rason nga inyendorsar da iti barangay ti napasamak.
