LAOAG CITY – Nagpaputok ti paltog ti sumagmamano a daras ti maysa a construction worker iti Brgy. Garreta iti ili ti Badoc.
Segun ken ni Police Captain Elison Pasamonte, ti Hepe iti Philippine National Police iti nasao nga ili, nabigbig ti suspek a ni Henry Bariao Layugan wenno mas am-ammo iti awag a Basi, adda iti umno a tawen, naasawaan ken residente iti nasao met laeng a barangay.
Inbatadna a basar iti insayangkatda nga imbestigasion, kabayatan nga umin-inom ti suspek iti maysa a tiangge kaduana ni Mike Tactacan Valido, ti suspek ket kellaat a nagprobokar iti saan pay a masinunuo a rason no sadino ket pukkawanna dagiti amin a lumabas nga indibidual.
Gapu iti daytoy, kunana nga adda ti maysa a saksi ti napan nanganawa iti suspek ngem saan daytoy a nagsardeng.
Nupay kasta, inpalgakna a kalpasan ti sumagmamano a minuto ket timmalaw ngem apaman a nagsubli ti suspek ket ditoy a nagpaputok daytoy ti sumagmamano a daras iti saan a masinunuo a direksion.
Mainaig iti daytoy, inlawlawag ni Police Captain Pasamonte a saan a nadangran ti saksi ken dadduma pay nga indibidual a dagus a nagtaray nga immadayo idinto ti suspek ket naglibas ken nagturong iti saan pay a masinunuo a direksion.
Innayonna a maibasar iti ocular inspection-da iti nakapasamakan iti insidente ket narekobreda ti lima a kapsula ti bala ti Calibre 9mm nga asideg iti tiangge iti nasao a barangay.
Naammoan a dagiti narekobre nga ebidensia ket naipan iti kuerpo ti pulisia para iti naan-anay nga imbestigasion sakbay a maikabil iti INCLO para iti Ballistic Examination.
Kabayatanna, iti agdama ket agtultuloy pay laeng ti panangbirbiruk dagiti otoridad iti suspek.
