LAOAG CITY – Nagpaputok ti paltog ti maysa a construction worker kabayatan nga agtutugaw iti naka-parking a kurong-kurong iti igid ti kalsada dagiti tallo a menor de edad iti ili ti Dingras.
Segun ken ni P/Maj. Norman Pentang, Hepe ti Dingras Municipal Police Station, nagpaputok ti paltog iti naminsan a daras ti suspek nga agtawen ti 35 gapu ta makaringgor dagiti nasao a menor de edad nga adda iti igid ti kalsada.
Gapu iti daytoy, insigida a nagtataray dagiti biktima nga agturong kadagiti pagtaenganda tapno ipakaammo kadagiti nagannakda ti napasamak kadakuada.
Mainaig iti daytoy, nagkamang dagiti menor de edad iti kuerpo ti pulisia kaduada ti kabagianda tapno pormal a mangipila ti reklamo kontra iti suspek.
Inbatad ni P/Maj. Pentang nga insigida a nangiwayat ti hot pursuit operation ti kapulisan a nangitunda ti pannakaarestar ti suspek kabayatan a gumatgatang iti maysa a tiangge.
Inlawlawagna a naala dagiti otoridad manipud iti suspek ti paltog a mapapati a nausar iti insidente nga adda ti kargana a maysa a bala, magazine nga adda ti kargana a tallo a bala ti caliber 9mm ken holster.
Malaksid iti daytoy, kunana nga iti panagkapkap dagiti otoridad iti suspek ket ditoy a nakumpiskar ti bassit a pouch a naglaon ti maysa a sachet a naglaon ti maatap a shabu ken tallo a bala ti caliber 9mm, 43 a plastic sachets nga awan ti nagianna, maysa a weighing scale ken dadduma pay.
Inpettengna a basar iti Civil Security Group ket awan ti naipakita ti suspek nga aniaman a dokumento ken lisensia ti nakumpiskar a paltog kenkuana.
Naammoan a ti suspek ket maibilang a Regional Target List ti Philippine Drug Enforcement Agency – Region 1.
Innayonna a mapilaan ti suspek iti kaso nga Illegal Discharge of Firearm, Grave Threat ken panaglabsing iti Section 11 ti Republic Act No. 9165 wenno ti Comprehensive Dangerous Drugs Act of 2002.
Kabayatanna, maipadalan iti counseling dagiti menor de edad babaen ti Department of Social Welfare and Development kalpasan a na-trauma dagitoy gapu iti napasamak.
