LAOAG CITY – Nasugatan dagiti dua a lallaki kalpasan a nagriri da panggep iti sweldo iti Brgy. 17 Sta, Asuncion iti ili ti San Nicolas.
Nabigbig ti biktima a ni Rex Banal Jr. y Nuñez, agtawen ti 39 naasawaan, construction worker iti Sta. Monica Homes, ken tubo iti Bicol idinto a ti suspek ket ni Isagane Cabagquez y Batilan, agtawen ti 44, naasawaan, foreman, tubo iti Balagtas, Bulacan ken agpada nga agnanaed iti construction site iti nasao a lugar.
Basar ti inisyal nga imbestigasyon ti PNP San Nicolas, idi laeng rabii, agarop alas-siete y media, maipagarup a nakainom ti biktima idi sinaludsod na ti suspek a foreman no kaano a maited ti sweldo na a na-delay iti agarup maysa a bulan.
Inlawlawag ni Cabagquez a maited ti sweldo da kalpasan ti lockdown.
Gapu iti daytoy, nairita ti biktima ket binekkel na ti suspek ngem inanawa dagiti dadduma nga empleyado.
Saan a nagbayag ket inatakar ti biktima ti suspek usar ti martilyo ket natuktokan na ti ulo ti suspek ngem ni Cabagquez ket nakaala met ti natarid a banag ket inbagkong na iti buksit ti biktima.
Naitaray ni Banal iti Black Nazarene Hospital idinto a naitaray ni Cabagquez iti Gov. Roque Ablan Sr. Memorial Hospital ditoy siudad ti Laoag ken simmuko kadagiti otoridad.
Inpetteng ni Isagane Cabagquez, foreman, a nabagkong na ti biktima a ni Rex Banal Jr kalpasan ti pannakadangran na.
Kuna nga isu kuma iti nagtalinaed iti ospital no bilang napuroan kenni Banal.
Nupay kasta, saan a kinayat ni Cabagquez a napasamak ti insidente.
Kabayatanna, inlawlawag ni Cabagquez kadagiti kakadua na iti construction ti possible a sitwasyon da idi naipatungpal ti lockdown ditoy probinsya.
Inbatad na a no adda ti sobra a kuarta ken mabalin da a bumale ken adda pay ti ipapaay ti amo da a taraon ken adda pay ti gundaway nga umutangen tapno adda ti kanen da.
Inbilin kenkuana ti boss da a no malpas ti lockdown ken dagus a maurnos ti payroll dagiti trabahador ken maited kadakuada ti sweldo da.
