LAOAG CITY – Nagtalinaed iti ospital ti maysa a lalaki a karaman iti napasamak a desgraysa iti paset ti national highway, bisinidad ti Brgy. 10, Estancia iti ili ti Pasuquin.
Segun ken ni PLt. Roi Manuel Ordonio, ti hepe ti PNP Laoag, agpapaamianan a direksyon ti motorsiklo nga inturong ti agtawen 31 a lalaki, construction worker ken residente iti Brgy. Davili iti nasao nga ili.
Kabayatanna, agpapaabagatan ti kotse nga inturong ti agtawen ti 22 a baro ken residente iti Brgy. 6 ditoy siudad.
Kuna ni Ordonio a dita a nag-overtake ti kotse ken naagawan na ti linya ti motorsiklo rason a nagdinnungpar dagitoy.
Gapu iti daytoy, naipurwak iti windshield ti kotse ti nangiturong ti motorisklo rason a nagsagaba ti sugat iti nagduduma a paset ti bagi partikular iti kattigid a saka na.
Saan met a naan-ano ti driver ti kotse pakairaman ti uppat a pasahero daytoy.
Naamoan nga awan ti silaw ti motorisklo rason a saan a naantisipasan ti driver ti kotse idinto nga adda iti impluwensya ti nasanger ti driver ti motorsiklo.
