LAOAG CITY – Natay ti maysa a construction worker kalpasan a binagkong ti kainnumanna iti Brgy. Puttao iti ili ti Solsona.
Segun ken ni Police Captain Randy Damo, Hepe ti Philippine National Police iti ili ti Solsona, nabigbig ti biktima a ni Ronald Daquioag y Bernabe, agtawen iti 56, awanan asawa ken residente ti Brgy. Juan iti ili ti Solsona idinto a ti suspek ket ni Rodrigo Asuncion y Labao, agtawen iti 66, awanan asawa, Quarry Caretaker ken residente ti Brgy. 55 Salet ditoy siudad ti Laoag.
Inbatadna a basar iti inwayatda nga imbestigasion, kabayatan nga agiinum ti biktima ken suspek pakairamanan dagiti dua a kaduada nga isuda Frederick Briones ken Reynaldo Edrada ket nagpakada nga agawiden iti pagtaenganda ti biktima ngem nangidiaya pay ti mainum ti suspek iti biktima.
Nupay kasta, kunana ket maipagarup a saan a pinatgan ti biktima ti kiddaw ti suspek kenkuana rason a nagbusor daytoy ken napan nangala ti buneng ken kutsilyo iti tricycle-na.
Gapu iti daytoy, inlawlawagna nga immuna a tinagbat ti suspek ti biktima iti akin-kannawan a takiagna ken inagawna ti kutsilyo nga iggem ti biktima ket ditoyna a binagkong ti buksitna iti naminsan a daras.
Mainaig iti daytoy, inpalgakna a ti biktima ket naideklara a dead on the spot babaen iti attending physician a ni Dr. Ruth De Lara ti Municipal Health Office iti ili ti Solsona.
Naammoan a dagus a naglibas ti suspek kalpasan ti insidente ngem insigida met laeng a natiliw babaen iti hot pursuit operation.
Kabayatanna, narekobre ti kutsilyo nga agatiddug ti 36.5 centimeters ken ti buneng nga agatiddug met ti 50 centimeters a nausar iti krimen iti lugar a nakapasamakan ti nasao nga insidente.
Iti agdama, adda iti kustodiar ti Philippine National Police iti ili ti Solsona ti suspek a manamnama a mapilaan ti kaso nga Homicide.
