LAOAG CITY – Dead on arrival iti ospital ti maysa a construction worker kalpasan a nagaburan ti daga manipod iti pundasyon ti maar-aramid nga adigi ti maysa a pasdek ti Data Center College of the Philippines iti Brgy. 1, San Lorenzo ditoy siudad ti Laoag.
Inpakaammo ni PCpl. Paul Rosete, Duty Investigator ti Philippine National Police Laoag Investigation Section a ti biktima ket agtawen ti 64, naasawaan, construction worker ken residente iti Brgy. Cabungaan-A ditoy siudad ti Laoag.
Inbatadna a malaksid iti pimmusay a nagaburan ket adda pay ti maysa a lalaki ngem kagudua laeng iti bagina ti nagaburan rason a dagus daytoy a naisalakan.
Mainaig iti daytoy, kuna ni Rosete a basar iti naisayangkat nga imbestigasion ket posible a limmukneng ti daga nga adda iti ngato a paset ti lugar iti pagkalkalian dagiti construction workers rason a nagreggay ken isu ti nangitunda iti pannakagaburda.
Inpakaammo na a mapattapatta nga adda iti 10 a kadapan ti kauneg ti nakagaburan ti biktima ken naiyaon babaen iti panagtitinnulon dagiti kakadua na a construction workers.
Kuna ni Rosete nga iti agdama ket manarimaan pay laeng ti naig-iget nga imbestigasion pakaseknan iti napasamak nga aksidente.
