LAOAG CITY – Natay ti maysa a lalaki kalpasan a nalmes iti dam iti ili ti Vintar.
Ti biktima ket agtawen ti 42, construction worker ken residente iti Barangay Parparuroc iti nasao nga ili.
Segun ken ni Police Capt. Jovelle Pascual, ti chief of police iti ili ti Vintar, nakaawat da ti report nga adda ti nalmes iti dam ken dagus da met a napan nagresponde iti lugar, kadwa da dagiti kameng ti Municipal Disaster Risk Reduction and Management Council ken Bureau of Fire Protection.
Nupay kasta, iti pannakaiyaon ti bagi ti biktima manipod iti tunnel ti dam ket indeklarar ti Municipal Health Officer a pimmusayen.
Inbatad ni Pascual a basar iti imbestigasyon da ket nabartek ti biktima idi napan nagdigus partikular iti tunnel iti dam tapno agpausaw.
Nupay kasta, saanen a nakita a limmung-aw ti biktima isut gapuna a nagreport dagiti tattao nga adda iti nasao a dam iti kwerpo ti pulisya.
Rumrumuar a tunggal makainom ti nasanger ti biktima ket ugali na ti mapan aguper iti danom tapno agpausaw.
