LAOAG CITY – Inbaga ni Police Lt. Jackson Sugayen iti Provincial Drug Enforcement Unit (PDEU) ditoy probinsya a ti subject iti inyuswat da a drug buy-bust operation a ni Romulo Ascado, agtawen ti 46, construction worker, residente iti Barangay Bungon iti ciudad ti Batac ket naka-probation iti kaso a carnapping.
Inbatad na a ni Ascado ket addan ti pannakatiliw na idi 2015 gapu iti kaso a panaglabsing iti Republic Act (RA) 9165 wenno Comprehensive dangerous drugs act of 2002 ngem nawaya-wayaan idi Agosto 2020 kalpasan nga inbasura ti korte ti kaso na.
Segun pay ken ni Sugayen, ni Ascado ket adda iti Regional Priority Target List ti PDEU.
Inlawlawag na a narigatan da a nangisayangkat ti operasyon kontra ken ni Ascado gapu ta ti balay da ket adda iti nasulimek a paset ti nasao a barangay ken aggaammo amin a tattao iti lugar.
Innayon na a no adda ti mapan a sabali a tao ket malasin da a dagus ken agdudua da amangan no kameng ti PDEU.
Nupay kasta, babaen ti tulong ti confidential informant da nga adda ti direct contact na ken ni Ascado ket nagballigi da a nangisayangkat ti operasyon kontra iti nasao a suspek.
Inpakaammo ni Sugayen a ti pagop-operaran ni Ascado ket iti ili ti San Nicolas, ciudad ti Batac ken iti dumaya nga ili a saannan a dinakamat pay gapu ta isu ti ayan dagiti kakadwa ti nasao a suspek.
Inbutaktak na pay a ti ilaklako ni Ascado ket dagiti pay laeng pondo da kadagiti immunan a natiliw a kakadwa na nga isuda
Rommel Pablo ken Jerry Valdez.
Immun-una iti daytoy, natiliw ni Ascado kalpasan a linakwan na ti nagpammarang a poseur-buyer ti 3 a sachet a naglaon ti maipagarop a shabu nga agbalor ti 5 ribo a pisos ken iti pannakakapkap na ket nakaala da pay iti dua a sachet a naglaon met laeng ti maipagarop a shabu ken maysa a Cal. 22 magnum revolver nga addaan ti 3 a bala.
Naglikudan met ni Ascado ti maipabpabasol kenkuana.
