LAOAG CITY – Nagballigi dagiti otoridad a nangtiliw iti maysa a construction worker iti naisayangkat a drug buy-bust operation iti paset ti Barangay Ricarte iti ciudad ti Batac.
Daytoy ti inbatad ni Police Lt. Col. Adrian Gayuchan, ti chief of police iti ciudad ti Batac.
Segun ken ni Gayuchan, ti suspek ket agtawen ti 45, construction worker ken residente iti Barangay Quiling Sur iti nasao a ciudad.
Inpakaammo na a nabayagen a monmonitoren da ti illegal nga aktibidad ti nasao a suspek.
Innayon na nga adda ti naala da iti ikot ti suspek a maipagarop a shabu nga agdagsen ti 0.5 a gramo, cellphone, maysa a pouch bag ken ti inusar na a motorsiklo.
Iti agdama, nagtalinaed iti kustodyar ti Philippine National Police ti suspek ken maisagsaganan ti maipila a reklamo seknan iti illegal a panaglako iti illegal a droga kontra kenkuana.
