LAOAG CITY – Natiliw ti maysa a construction worker iti naisayangkat a drug buy-bust operation iti paset ti Barangay Bagut iti ili ti Dingras.
Nabigbig ti subject ti operasyon a ni Christoper Ucol, agtawen ti 36, construction worker ken taga Barangay Mandaloque iti ili ti Dingras.
Inlawlawag ni Ucol a mapan koman agubra iti Barangay Tonoton iti ili ti Piddig idi adda ti nangsada kenkuana ken iti panagsardeng na ket inpakammon ti nangpara a maysa daytoy a kameng ti pulisya, kagiddan ti panangposas da kenkuana.
Naakusaran ni Ucol a naglako ti maysa a sachet a naglaon ti maipagarop a shabu, malaksid pay ti maysa a sachet a naglaon met laeng ti shabu a naala iti ikot na, ngem naiget a naglikudan daytoy ti subject ti operasyon.
Inadmitir ni Ucol nga idi adda idiay Bulacan ket nagus-usar ti illegal a droga ngem sipud idi nagsubli iti barangay da idi 2018 ket naminpinsanen nga insardeng na ti madi nga aramid na.
Mainaig iti daytoy, inbaga ni Barangay Chairman Richard Marquez iti Barangay Mandaloque iti ili ti Dingras a sipud nagsubli ni Ucol iti Barangay da idi 2018 ket awan pay ti nakairamramanan na nga insidente.
Nupay kasta, adda iti maysa a gundaway a naibaga kenkuana ni Ucol nga adda ti mangsipsiput kenkuana gapu iti maipagarop nga illegal a droga.
Binalakadan met ti kapitan ni Ucol a baybay-an na latta nga uray adda ti mangsisiim kenkuana no awan ti madi nga ar-aramiden na.
Inpasingked met ni Kapitan Marquez nga awan pulos ti naipalpalayag kenkuana mainaig iti maipagarop a kaadda ti illegal nga aktibidadni Ucol.
Kabayatanna, inbatad ni Police Major Ryan Retotar, ti chief of police iti ili ti Dingras nga umabot ti 3 a bolan a minonitor da ni Ucol.
Kinumpirmaran na a ni Ucol ket adda iti Drug watchlist ti PNP-Dingras ken saan a drug surrenderer
Inpakaammo na pay a saan laeng nga iti ili ti Dingras ti paglaklakoan na ti illegal a droga no di ket uray kadagiti dadduma nga ili ditoy probinsya.
