LAOAG CITY – Natiliw ti maysa a construction worker iti inyuswat nga entrapment operation ti PNP-CIDG Ilocos Norte iti maysa nga hotel iti Barangay Balatong ditoy ciudad ti Laoag.
Binigbig ni Police Major Nelson Apostol, ti mangidadaulo iti PNP-CIDG, ti suspek iti nagan na a Joel, agtawen ti 33, construction worker, taga Ormoc City, Leyte ngem agdama nga agnanaed iti Barangay 44, Zamboanga ditoy ciudad.
Inbaga ni Apostol a basar iti imbestigasyon da ket nangrugi idi mayo itay napan a tawen ti relasyon ti suspek ken ti babai nga agtawen ti 44, addaan ti asawa, helper iti maysa a kantina iti asideg ti Bombo Radyo ken taga Allacapan, Cagayan.
Rumrumuar nga iti naminsan a panagkanaig da ket inlibas ti suspek nga invideo ti ar-aramiden da ken idi setyembre 2020 ket inpatulod na ti video iti babai a nakakigtotan ti biktima isut gapuna a kayat nan ti makisina iti lalaki.
Inbatad ni Apostol a basar iti biktima ket binutbuteng pay ti lalaki daytoy a no saan a makipagkita manen iti hotel ket iwaras nan ti video da a dua.
Gapu iti daytoy, nagkamang ken nagpatulong ti babai iti PNP-CIDG ditoy probinsya ken iti inyuswat da nga entrapment operation ket nagballigi da a nangtiliw iti suspek.
Dagus a nainquest ti kaso a panaglabsing iti Republic Act (RA) 9262 wenno Anti-Violence Against Women and Their Children Act kontra iti suspek ken nairekomendar ti 36 a ribo a pisos a pagpiyansa na.
Malaksid iti daytoy, naipilaan pay ti reklamo a panaglabsing iti Republic Act (RA) 9995 wenno Anti-Photo and Video Voyeurism Act ngem dumalan paylaeng daytoy ti preliminary investigation.
Iti agdama, nagtalinaed ti suspek iti kustodyar ti PNP-CIDG.
