LAOAG CITY – Natiliw ti maysa a construction worker kalpasan nga inpurwak na ti maysa a sachet a naglaon ti maipagrup a napagango a bulong ti marijuana idi Brgy. San Marcos iti ili ti San Nicolas.
Nabigbig ti suspek a ni Carl John Barroga, agtawen ti 22, baro, ken residente iti Brgy. 11 San Fernando ti nasao nga ili.
Inadmitir ti suspek a kukua na ti inpurwak na a marijuana.
Malaksid iti daytoy, nakumpiskar pay dagiti otoridad manipud iti ikot ti suspek ti maysa a vape, sigarilyo ken charger.
Segun kenni Barangay Chairman Federico Simpliciano, adun dagiti gulo a nakairamanan ti suspek basar kadagiti naiyuswat a taripnong kadagiti pada na a kapitan.
Inbatad na a dati a naibalud iti Ilocos Norte Provincial Jail gapu iti panagtatakaw.
Kabayatanna, kinumpirmaran ni Police Major Joseph Baltazar, hepe ti PNP San Nicolas a karaman ti suspek iti watchlist.
Naamuan ti Bombo Radyo Laoag a bayat ti panagpatrolya dagiti otoridad iti nasao a barangay ket naripar da a maipagarup nga adda iti sabali a garaw ti suspek agingga nga adda ti inpurwak na a sachet a maipagarup a naglaon ti napagango a bulong ti marijuana a rason ti nakatiliwan na.
