LAOAG CITY – Balligi ti inyuswat a drug buy bust operation dagiti kameng ti PNP ken PDEU iti Brgy. 4-San Bartolome iti ili ti San Nicolas.
Daytoy ti inpakaammo ni PMajor. Joseph Tayaban, ti chief of police iti nasao nga ili.
Inbatad ni Tayaban a napasamak ti transaksyon iti mismo a pagtaengan ti suspek a ni Edwin Tabiolo, agtawen ti 37, awanan asawa, construction worker ken residente iti nasao a lugar.
Kuna na a maysa nga heat sealed sachet ti maipagarup a marijuana ti inlako ti suspek iti nagpammarang a poseur buyer ken agbalor daytoy iti 500 a pisos.
Mainaig iti daytoy, inpakaammo na a ti suspek ket immunan a natiliw itay napan a tawen gapu iti kapada a kaso ngem nawaya-wayaan ken intultuloy na ti iligal nga aktibidad na.
Inbatad na a karaman daytoy iti Balagsit Drug Group nga agop-operar ditoy probinsya kadua na ti immunana a natiliw ditoy siudad ti Laoag nga aglaklako met laeng ti marijuana ken isu ti supplier daytoy.
Kabayatanna, ti suspek et maibilang nga street level individual.
