LAOAG CITY – Inyistorya ni Pastor Jun Bagayas, ti consultant ti Barangay Affairs iti ili ti Paoay no kasano a naibilang isuna kas secondary contact iti nagpositibo iti virus a kaanakan na iti Barangay Sangladan.
Segun kenni Pastor Bagayas, nagatendar iti barangay assembly iti Barangay Laoa iti nasao nga ili kas iti nagtutulagan da iti munisipyo ngem saan na a pinalpas ti nasao a panagtataripnong gapo ta mapan da iti groserya kadwa na ti asawa ken anak na.
Inlawlawag na nga idi adda isuna iti grocery store ket timmawag kenkuana ti municipal administrator Shiela Galano tapno ipakammo a kalikagom a kasarita ni Dr. Alfredo Domingo, ti Municipal Health Officer iti ili da.
Inbatad na nga inpakammo kenkuana a secondary contact da gapo ta nakapulapol da met ti primary contact nga isu ti nagannak ti nagpositibo iti covid19, ken nabalakadan dagitoy nga aghome quarantine.
Kunana a dumalan iti swab test dagiti nagannak ti nagpositibo ken no negatibo ti resulta ket clear da a sangkapamilyaan ngem masapol nga itultuloy latta dagiti agasawa ti 14-day quarantine da.
Inbatad na nga idi kinasarita na dagiti primary contact ket inbaga da a saan da met a simrek a mismo iti naka-quarantinan ti anak da no diket inyawat da laeng ti kanen ti maseknan.
Rumrumwar pay nga awan ti nadanon dagiti agasawa nga agbanbantay iti quarantine facility isut gapo na a dagitoy ti nangiyawat iti makan.
Mainaig iti daytoy, kunana a daytoy ti nangrugyan ti panagamak ti publiko iti gapo iti panagatendar na iti barangay assembly.
Nagpadespensar met ni Pastor Bagayas gapo ta saan na met nga ammo ti sitwasyon idi napan nagatendar iti assembly ngem inalay-ayan na ti panagamak dagitoy.
Kayatanna, innayon ni Pastor Bagayas a dumalan iti disinfection ti opisina ti Mayor iti nasao nga ili.
