LAOAG CITY – Dagus a naiyuswat ti contact tracing tapno madeterminar no siasinno dagiti nakapulapol ni IN-C110, maysa a frontliner iti covid-19 hospital.
Daytoy ti inbatad ni Barangay Chairman Romeo Bagaoisan iti Barangay Baay iti ciudad ti Batac.
Segun kenni Bagaoisan, idi naamoan da a nagpositibo ti agnanaed iti barangay da ket dagus da a nagturong iti pagtaengan daytoy ken binagaan da ti kabbalay ti pasyente a saan da a rumrumwar.
Naamoan a ti pasyente ket maysa a padi, agtrabtrabaho pay iti Mariano Marcos Memorial Hospital and Medical Center ken agkaskasera iti nasao a barangay.
Inbatad na a ti gagem ti dagus a pannakaiyuswat ti contact tracing ket tapno saanen a makarwar dagiti primary contact ni IN-C110 ken awan dagiti makapulapol da.
Kunana a naiget a bantayan da ti nasao a lugar ken awan ti rumwar iti pagtaengan agingga a saan da a maswab test ken maamoan ti resulta na.
Mainaig iti daytoy, kuna ni Bagaoisan nga insarita na iti health team a dagus kuma a dumalan dagiti primary contact ni IN-C110.
Ummuna iti daytoy, inbatad ti kapitan a timmawag kenkuana ni INC-110 ken inbaga daytoy kenkuana nga awan ti marikrikna a sintomas ti virus ken nasayaat ti kasasaad na.
Kabayatanna, kunana a ma-lockdown ti Purok iti 14 nga aldaw ken agarop 10 a pamilya ti maapektaran.
Innayon na nga iti panagsarita kenni Mayor Albert Chua ken mapalubusan latta a rumwar dagiti agtrabtrabaho wenno maibilang nga APOR.
Immapela met daytoy kadagiti kabarangayan na a sumurot kadagiti health protocols kas iti panagusar ti face mask ken dadduma pay.
