LAOAG CITY – Inlawlawag ni Dr. Norman Rabago, ti covid-19 consultant ditoy probinsya ti contact tracing kadagiti nakapulapol ti kailian a nakaptan ti B.1.1.7 variant ti covid-19 wenno ti UK variant.
Kunana nga agingga iti third degree wenno tertiary contact ti masapol a dumalan iti swab test ken dumalan iti isolation.
Inbatad na a daytoy ti rason a nabalakadan dagiti amin a nagturong iti maysa a panganan iti border iti ili ti Badoc.
Immuna iti daytoy, inpakaamo ni Rabago a bayat a naka-isolate ti pasyente iti border, nagpagatang ti kanen na iti restaurant rason nga amin a ti nagpagatangan na pakairamanan dagiti naglako ken napan nangan iti nasao a restaurant ket maibilang a contact ti nagpositibo.
Inbatad na a simmangpet iti Metro Manila ti pasyente idi Enero 24 ken dita a dimmalan iti swab test ken nagpositibo ti resulta daytoy.
Gapu iti daytoy, inbaga na a manipod Enero 24 agingga Pebrero 7 ket nag-quarantine ti pasyente sakbay a nagawid ditoy probinsya idi Pebrero 8.
Kabayatanna, kuna na a malaksid iti swab test, naipadalan pay iti genome sequencing ti sample tapno maamoan nu positibo wenno saan iti UK Variant.
Nu pay kasta, inbunannag ti covid-19 consultant a Pebrero 13 laeng idi naipakaamo a positibo iti UK variant ti pasyente.
Inpakaamo na a nagtalinaed iti provincial isolation facility ti pasyente ken manamnama a dumalan iti swab testing ita nga aldaw pakairamanan dagiti immunan a nadeterminar a contact daytoy.
