LAOAG CITY – Naiget a contact traning ti iyuswat ti lokal a gobyerno iti ili ti Vintar partikular iti biang ti Rural Health Unit kalpasan a nairekord ti COVID-19 positive.
Daytoy ti inbatad ni Dr. Heidi Marita Albano, municipal health officer iti ili ti Vintar.
Kuna na a malaksid iti contact tracing ket naipan met iti isolation dagiti nakapulapol ti pasyente, maiyuswat ti monitoring, pannakaipangato ti immune system dagiti maseknan ken dadduma pay.
Segun kenni Albano, nasken nga ammuen da dagiti high risk ken low risk contact tapno ammo da dagiti maipadalan iti quarantine procedure.
Inbatad na nga umabot iti 55 dagiti frontliner ti kasapulan nga ideterminar da.
Umabot met ti 51 dagiti tattao nga adda kadagiti quarantine facility iti ili da.
Naamuan na a 16 dagiti contact person ti maseknan a pasyente ngem dua laeng dagiti nagawid ditoy Ilocos Norte, maysa ditoy ti taga Brgy. San Nicolas.
Nagtalinaed iti isolation ti maseknan a pasyente ken bukod na ti kuarto na, sarili na ti comfort room ken ti water dispencer para iti hydration.
Kabayatanna, inlawlawag ni Dr. Albano, ti panagbulontaryo nga agbayad ti maseknan a dimmalan iti swab test.
Kuna na nga initiyatibo ti lokal a gobyerno ken inaprobaran ti maseknan gapu ta kayat na a masgurado nga awan ti virus na sakbay nga agawid iti pamilya na.
Segun kenni Dr. Albano, saan na nga ammo seknan ti 1,000 a pisos a pinagbayad ti maseknan gapu ta nairequire iti maseknan ti philhealth number na, ken ti sertipikasyon manipud iti barangay a mangibaga nga isuna ket distress and indigent OFW.
Kamaudianna, naladingit ti pamilya ti OFW a nagpositibo iti coronavirus.
Nupay kasta, inalay-ayan ni Dr. Albano ti rikna ti pamilya ti nasao a pasyente.
Inlawlawag na a ti history ti nagturongan ti OFW a napan iti OWWA ket dimmalan iti RT-PCR ngem negative ti resulta na.
Iti maikapito nga aldaw ti maseknan ket nagpositibo iti rapid test kangrunaan iti IGG wenno adda ti sinagaba na a sakit a nalabanan ti bagi na wenno adda iti exposure ti maseknan.
Iti maika-14 nga aldaw ti maseknan ket nagpositibo manen iti IGG ken iti inpadalan da iti Swab test ket dita a naduktalan a positibo iti nasao a virus.
