LAOAG CITY – Inlawlawag ni Father Arvin Mangrubang, Convenor ti SALUADAN AGAINST ENVIRONMENTAL ABUSE dagiti negatibo nga epekto na no ipalubos ti gobierno probinsyal ti pannakaipatakder ti 2000megawatts offshore wind turbine powerplant iti paset iti ili ti Pasuquin, Burgos, Bangui ken Pagudpud.
Segun kenkuana, karaman kadagiti kangrunaan a maapektaran ket dagiti mangngalap ken dagiti residente nga asideg iti pakaipatakderan ti turbina.
Inpetteng ni Father Mangrubang a no maipatungpal ti nasao a proyekto ket dakkel ti posibilidad na nga awan ton ti pagkalapan dagiti mangngalap gapu ta mapukaw ton ti biodiversity dagiti ikan.
Kuna na pay a pumanaw dagiti ikan gapu iti electromagnetic field nga itunda ti turbina ken maperdi dagiti corals, banag a daytoy ti maysa a pakaseknan ni Mangrubang gapu ta awanton ti pagkalapan dagiti mangngalap kadagiti ili a pakaipatakderan ti offshore wind turbine powerplant.
Malaksid iti daytoy, saan payen a mapalubusan dagiti mangngalap a mapan agkalap, 50 a metro manipod iti nakaipasdekan ti turbina.
Gapu iti daytoy, inrakurak ni Mangrubang a manariman ti panagpapirma da ti petisyon tapno maisardeng ti pannakaipasdek ti offshore windmill ditoy probinsya.
