LAOAG CITY – Natiliw ti maysa a Cook iti mismo a pagpapaayanna a carinderia iti paset ti Discolandia, Brgy. 1, San Lorenzo, Laoag City, Ilocos Norte.
Daytoy ket kalpasan ti balligi a pannakaisayangkat ti Anti-Illegal Drug Buy-Bust Operation babaen ti nagtitipon a puersa ti PNP personnel ti Laoag City Police Station kas lead unit, PIU, Provincial Drug Enforcement Unit – Ilocos Norte Police Provincial Office.
Nabigbig ti suspek a ni Francis Joseph Agodon y Ruiz, naasawaan ken residente ti Brgy. 2, Santa Joaquina ditoy Siudad ti Laoag.
Basar iti Philippine National Police – Laoag, naarestar ti suspek kalpasan a maipagarup a naglako daytoy ti maysa a heat sealed plastic sachet a naglaon ti maatap a shabu iti nagpammarang a police poseur buyer.
Malaksid iti dayta, nakumpiskar pay dagiti otoridad iti suspek ti dua nga heat sealed plastic sachet a naglaon ti maipagarup a shabu, maysa a one thousand peso bill a nausar kas Marked Money ken maysa nga unit ti Iphone 7 cellphone nga agmaris ti nangisit pakairamanan ti kuartana a 1,120 iti nagduduma a denominasion.
Mainaig iti daytoy, naiget met a naglikudan ti suspek a kukuana dagiti naala manipod kenkuana.
Inpettengna a saan daytoy nga agus-usar ken agilaklako ti iligal a droga ken nakasagana daytoy a dumalan ti drug test tapno ditoy a makita ken mapaneknekan a nagbalbaliw daytoyen.
Mamati ti suspek a naipabulsa laeng kenkuana dagiti items a mapapati a shabu.
Iti agdama, manamnama ti pannakaipila ti kaso kontra iti suspek gapu iti panagsalungasingna iti Republic Act No. 9165 wenno ti Comprehensive Dangerous Drugs Act of 2002.
Naammoan a natiliw idin ti suspek gapu met laeng iti nasao a kaso idi Hulyo 2021 ngem nakaruar iti pagbaludan babaen ti plea bargaining.
