LAOAG CITY – Sinaggaysa ni Police Major Joseph Baltazar, ti chief of police iti ili ti San Nicolas dagiti napintas a naaramidan da kabayatan ti eksklusibo nga interview kenkuana ti Bombo Radyo Laoag.
Karaman kadagiti napintas a naaramidan ti PNP-San Nicolas babaen ti liderato ni Baltazar ket ti pannakaarestar da ti maibilang a wanted person iti ili a ni Nelson Abadilla idi June 29 ita a tawen iti Brgy. 45, Tanguid ditoy ciudad ti Laoag.
Inbaga na a no iti biang iti illegal a droga ket awanen aktibidad dagiti drug personalities iti ili ti San Nicolas ngem agtultuloy latta ti panangmonitor da kadagitoy.
Innayon na nga uray dagiti agsusugal iti nasao nga ili ket nagparbeng dan, ngem inpasigurado da a no adda dagiti mamonitor da ket mangiyuswat da a dagus ti operasyon.
Inpanakkel pay ni Baltazar a malaksid ti crime prevention ket tumultulong da pay kadagiti residente nga agkasapulan.
Kabayatanna, inpakaammo ni Baltazar a tapno maliklikan dagiti nagduduma a krimen iti ili ti San Nicolas ket kanayun ti pannaki-koordinar da kadagiti opisyal ti barangay ken dagiti residente a tumulong a mangkita ti linak, urnus ken talna iti nasao nga ili.
Naituding intono bigat, Hulyo 10 a panagreport ti PNP-San Nicolas kadagiti napintas a naaramidan da iti Ilocos Norte Police Provincial Office (INPPO).
