LAOAG CITY – Inlawlawag ni Police Captain Joseph Tayaban, ti chief of police ti PNP-Badoc nga idi pay laeng Setyembre 7 ti executive order 90-20 ni Gov. Matthew Marcos Manotoc a nakilanad a ti masapol a maipakita sakbay a makastrek ditoy probinsya ket ti negatibo a resulta ti Antigen test no awan ti RT-PCR Test.
Daytoy ket kalpasan nga ti naawat ti Bombo Radyo Laoag a report nga adda dagiti na-stranded iti border gapo ta ti ammo da ket mayat pay laeng ti rapid test tapno makastrek ditoy Ilocos Norte.
Segun kenni Tayaban, itay kallabes ket adda ti panangilawlawag na seknan iti daytoy tapno maimpormaran dagiti indibidwal a sumrek ditoy probinsya.
Inbatad na a dagiti agpatest iti Antigen iti border ket adda ti bayadan da a sangaribo a pisos ken maamoan ti resulta iti uneg ti 30 a minutos agingga iti maysa nga oras.
Mainaig iti daytoy, kuna ni Tayaban a maysa kadagiti nagbalin a problema da ket naibusan ti test kit ngem nasolbar da met laeng daytoy.
Kabayatanna, inlawlawag ni Tayaban a dagiti sumsumrek ditoy probinsya iti mamitlo a daras agpangato ket mausar da laeng ti Antigen test da iti maminsan iti makalawas idinto a dagiti maminsan wenno mamindua a daras a sumrek ditoy Ilocos Norte ket mausar da daytoy iti uneg ti dua a lawas wenno 14 nga aldaw.
