LAOAG CITY – Kinumpirmaran ni Police Lt. Col. Randy Baoit, pannakangiwat ti Ilocos Norte Police Provincial Office (INPPO) nga inadmitir ni Police Lt. Roi Manuel Ordonio, hepe ti PNP-Pasuquin a nagpaputok ti paltog ni Patrolman Robin Andres.
Daytoy ket kabayatan ti pannakaiyuswat ti Anti-Illegal Gambling Operation iti Barangay Davila iti nasao nga ili no sadinno a timmaod pay dagiti dadduma nga alegasyon kontra kenni Andres.
Segun kenni Baoit, iti palawag ni Ordonio ket adda ti komosyon kabayatan ti operasyon ken tapno maliklikan ti paagrarambol wenno adda ti madangran gapo ta ado ti tao a nagsusugal rason a maipagarop nga inusar ni Andres ti paltog na.
Inlawlawag na a kalpasan a nagreport ni Barangay Chairman Elviro Agoo ken dagiti sumagmamano a residente iti INPPO ket indeposito ni Andres ti paltog na ken nakasagana a mangsango no adda ti maipila a reklamo kontra kenkuana.
Inbatad na a no anyaman ti resulta ti imbestigasyon da ket idanon da daytoy kenni Pol. Col. Christopher Abrahano, ti Provincial Director ken agdepende kenkuana no anya ti pagbanagan ni Andres.
Kunana a basar kenni Ordonio ket naminsan laeng a nagpaputok ti paltog ni Andres ngem iti alegasyon dagiti residente ket namindua a daras.
Mainaig iti daytoy, kuna ni Baoit nga imbestigaren da a nalaing ti nakita a maysa a basyo ti paltog iti nakapasamakan ti panagpaputok ni Andres ti paltog.
Innayon na a no mapaneknekan a nagbasol ni Andres ket nasken a suruten da no anya ti ibagbaga ti linteg kangrunaan na iti PNP.
Maipalagip a lima a tattao ti natiliw a nagsusugal ken napilaan ti reklamo iti inquest proceedings.
